Islami Jamiat Talibat Pakistan


دعوتی سرگرمیاں	کتب	مصنوعات	تصاویر	آڈیو	بزم گل


رمضان اسپیشل	پکار	دستور	وظایف	حالیہ واقعات

	تعارف اسلامی جمعیت طالبات، پاکستان
	آپ طالبہ ہیں؟ محسوس کرتی ہیں،کچھ کرنا چاہتی ہیں؟ دین کی سر بلندی کا جذبہ رکھتی ہیں۔۔۔؟ دنیا میں اسلام اور مسلمانوں کے خلاف کفر کی سازشوں پر متفکر ہیں؟ اسلام کا غلبہ دیکھنا چاہتی ہیں۔۔۔۔؟ اپنی صلاحیتوں کا لوہا منوا کر پاکستان کی خدمت کرنا چاہتی ہیں؟ تو اپنے دل کی اس پکار پر لبیک کہیے ............ آپ کے جذبات قابل قدر ہیں! اور اللہ کی راہ میں آپ کی صلاحیتوں کا استعمال ان کا بہترین مصرف ہے خوش نصیب ہیں آپ! جو محسوس کرنے والے دل اور سوچنے والے ذہن کی نعمت سے نواز دی گئی ہیں ! آئیے !! ان جذبات کو عمل کا روپ دیجئے ....! اٹھیے!!.... اور خیر امہ [ بہترین امت] کا حصہ بن جائیے!! جس کا شیوہ بھلائی ہے !! سورة آل عمران میں اللہ پاک کا ارشاد ہے۔ ولتکن منکم امة یدعون الی الخیر و یامرون بالمعروف وینھون عن المنکر ( ال عمران ۳:۴۰۱) تم میں کچھ لوگ تو ایسے ضرور ہونے چاہئیں جو نیکی کی طرف بلائیں ، بھلائی کا حکم دیں، اور برائیوں سے روکتے رہیں۔ دیکھئے! اللہ تعالیٰ ہمیں خطاب کر کے کیا فرماتے ہیں ........ کنتم خیرامة اخر جت للناس تٲمرون بالمعروف و تنھون عن المنکر و تومنون باللہ ﴿ال عمران ۳:۰۱۱﴾ "اب دنیا میں وہ بہترین گروہ تم ہو جسے انسانوں کی ہدایت و اصلاح کے لیے میدان میں لایا گیا ہے۔ تم نیکی کا حکم دیتے ہو، بدی سے روکتے ہو اور اللہ پرایما ن رکھتے ہو۔" اللہ تعالیٰ نے ہمارے اموال، وقت اور صلاحیتیں جنت کے بدلے میں خرید لی ہیں۔ ان اللہ اشتری من المومنین انفسھم بان للھم الجنة ﴿التوبہ ۹:۱۱۱﴾ "حقیقت یہ ہے کہ اللہ نے مومنوں سے اوران کے نفس اور ان کے مال جنت کے بدلے میں خرید لئے ہیں۔" اقامت دین کا یہ کام .... حق کی گواہی کا یہ فریضہ جو اللہ تعالیٰ نے مومنین کی ذمہ داری ٹھہرایا ہے.... ہمیشہ سے ادا ہوتا آیا ہے اور ہمیشہ سے ادا ہوتا رہے گا!!! انبیا کرام علیہ اسلام ، صحابہ کرام ؓ اپنا کام کر کے چلے گئے۔ اب یہ فریضہ اللہ کے مومن بندوں کے سپرد کر دیا گیا ہے! ایمانی غیرت سے سر شار اللہ کے بندے نیکی کا حکم دینے اور برائی سے روکنے کے لیے ہمیشہ مصروف عمل رہتے ہیں طالبات کا ایک ایسا گروہ ” نحن انصار اللہ “ [ ہم ہیں اللہ کے مدد گار] کا عزم لیے آپ کے آس پاس بھی موجود ہے !!! ”اسلامی جمعیت طالبا ت پاکستان “ ............ ستمبر ١۹٦۹ء میں ملتان کے ایک کالج کی محض پانچ طالبات کے عزم کی زندہ تصویر ہے جو آج وطن عزیز کے کونے کونے میں طالبات تک اسلام کا پیغام پہنچانے ، انھیں اسلام کے جھنڈے تلے جمع کرنے اور برائی کے خلاف جہاد میں مصروف عمل ہے۔ جس کا نصب العین ہے ....

	ہمارا نصب العین
	اللہ اور اس کے رسول اللہ ﷺ کے بتائے ہوئے اصولوں کے مطابق انسانی زندگی کی تعمیر کے ذریعے رضائے الٰہی کا حصول “

	ہمارا پروگرام
	١۔ طالبات تک اسلام کی دعوت پہنچانا۔ اسلام کا علم حاصل کرنے کے لیے رغبت دلانا۔ اسلام کے عملی تقاضوں کو پورا کرنے کا احساس بیدار کرنا اور دوسرے نظام ہائے حیات کے مقابلے میں اسلام کی برتری ثابت کرنا۔ ۲۔ ایسی طالبات جو اسلامی زندگی کے قیام کے لیے کام کرنے کو تیارہوں انھیں جمعیت کے تحت منظم کرنا ۳۔ جو طالبا ت منظم ہوجائیں ان کی فکری اور اخلاقی تربیت کے لیے موثر انتظام کرنا۔ ۴۔ طالبات میں بڑھتی ہوئی بے پردگی اور عریانی کے رحجان کو ختم کرکے اسلامی اقدارو اخلاق اور اسلامی عادات و خصائل کی ترویج کرنا۔ ۵۔ پاکستان میں اسلامی نظام تعلیم کے قیام کے لیے کوششیں کرنا اور طالبات کے جائز مطالبات منوانے اور ان کی مشکلات دور کرنے کی جدو جہد کرنا نیز ان کے اجتماعی مسائل میں ان کی رہنمائی کرنا۔

	ہمارا پیغام........ آپ کے نام
	ہماری دعوت........دعوت الیٰ اللہ ہے! زندگی کے تمام دائروں میں اللہ کی حاکمیت تسلیم کرتے ہوئے اس کے فرمانبردار بندے بن کر رہنے کی دعوت ہے ، اس پیغام کو پاکستان کی ہر طالبہ کے دل تک پہنچانا ہمارا مشن ہے! بنیادی طور پر تعلیمی ادارے ہی جمعیت کی دعوت کے اہم مراکز ہیں البتہ رہائشی سطح پر بھی قرآن کی دعوت عام کرنے کے درج ذیل پروگرامز منعقد کئے جاتے ہیں۔ دعوة بالقرآن دلوں کو گرمانے والی دعوت تو قرآن ہی کی ہے ........ قرآن کی تعلیمات کو سیکھنے ، سکھانے اور عمل میں اتارنے کے جمعیت طالبات کی جانب سے مختلف پروگرامز اور کورسز کا انعقاد کروایا جاتا ہے۔ قرآن اسٹڈی پراجیکٹس: یہ طویل دورانیے کے کورسز ہیں جن میں قرآن،حدیث ، تجوید اور فقہ کے بنیادی علوم سکھائے جاتے ہیں۔ فھم القرآن کلاسز [کورس۱۔۲]یہ مختصر دوانیہ کی کلاسز ہوتی ہیں جس میں قرآن و حدیث کے منتخب حصے اور بنیادی عربی گرامر سکھائی جاتی ہے۔ جمعیت ........ تعلیمی میدان میں اسلامی جمعیت طالبات پاکستا ن علم و دوستی کو پروان چڑھانے ، طالبات کی تخلیقی صلاحیتوں کو ابھارنے ، ان کی صلاحیتوں کو دین کی راہ میں استعمال کرنے اور تعلیمی اداروں میں مثبت تفریحی سرگرمیاں رکھوانے کے شعبہ امدادو طالبات کے تحت مختلف قسم کی منفرد اور دلچسپ سرگرمیاں منعقد کرواتی رہتی ہے۔ جن کی ایک جھلک پیش خدمت ہے۔ ٹیلنٹ ایوارڈ شوز: مختلف شعبہ ہائے تعلیم میں نمایاں کارکردگی کا مظاہرہ کرنے والی طالبات کی حوصلہ افزائی کے لیے تعلیمی اداروں میں ٹیلنٹ ایوارڈ شو منعقد کیے جاتے ہیں۔ سٹوڈنٹس فورم: ملکی اور بین الاقوامی ایشوز، تعلیمی تبدیلیاں اور مسائل ، معاشرتی زندگی میں طالبات کا کردار اور ایسے ہی دیگر موضوعات پر جمعیت طالبات کے تحت سٹوڈنٹس فورمز اور ٹاک شوز کا انعقاد کیا جاتا ہے۔ ان فورمز کے ذریعے طالبات کو اہم ایشوز پر اپنی آرا ءکے اظہار کا موقع دیا جاتا ہے۔ کتاب میلے: کتاب دوستی کے رحجان کو پروان چڑھانے کے لیے جمعیت طالبا ت کالجز اور یونی ورسٹیز میں رعایتی کتاب میلوں کا انعقاد کرواتی ہے۔ داخلہ مہم: تعلیمی اداروں میں جمعیت کی پہچان داخلہ مہم ہے۔ جس میں طالبات کو خوش آمدید کہنا، ان کی مناسب رہنمائی کرنا ، فرسٹ ایئر فولنگ کی روک تھام کرنا وغیرہ شامل ہیں۔ تقریری مقابلے/ مباحثے : طالبات کی تقریری صلاحیتوں کو اجاگر کرنے کے لیے جمعیت وقتاً فوقتاً دلچسپ عنوانات پر مقابلے/ مباحثے رکھواتی رہتی ہے۔ لیڈنگ لائبریز : جمعیت کی لیڈنگ لائبریریز کم وبیش تمام تعلیمی اداروں میں قائم ہیں۔ آپ جب چاہیں اس سے استفادہ کر سکتی ہیں۔ شعبہ و وظائف: جو طالبات مالی و سائل کی کمی کے سبب تعلیمی سلسلہ منقطع کرنے پر مجبور ہوں؛ شعبہ و وظائف ان کی خدمت پر مامور ہے۔ جس کے تحت ان کے سالانہ / ماہانہ فیسوں کے اخراجات برداشت کرنا، یونیفارم/ کتابوں کی فراہمی جیسے کام کیے جاتے ہیں۔ تعلیمی اداروں میں مسائل کا حل: تعلیمی اداروں میں سہولیات کا فقدان ، آمدو رفت کے مسائل، فیسوں میں بے جا اضافہ ، تجربہ کار اساتذہ کی کمی ، کلاسوں کی بے قاعدگی........ ان مسائل کو انتظامیہ تک پہنچانا اور انہیں حل کروانا جمعیت کا خاص شیوہ رہا ہے۔ علم و ادب کی سوسائٹی: یہ سوسائٹی ادبی ذوق رکھنے والی طالبات کو ایک موثر پلیٹ فارم مہیا کرتی ہے۔ جہاں تخلیقی صلاحیت کی حامل طالبات اپنی قلمی طاقت میں پختگی اور نکھار پیدا کر کے ملک و قوم کا نام روشن کرتی ہیں۔ سرگرمیاں۔ ادبی نشستیں۔ ادبی تربیتی کورسز۔ مشاعرے۔ انعامی تحریری مقابلہ جات۔ مجلات کا اجراء۔ نظام تعلیم اور اسلامی جمعیت طالبات پاکستان تعلیم اور نظام تعلیم سے جمعیت کا رشتہ فطری ہے۔ اسلامی نظام تعلیم کے قیام اور تعلیم سے متعلقہ ہر معاملے پر جمعیت نے قابل قدر اقدامات اٹھائے ہیں۔ کیرئیر گائیڈنس۔ تعلیمی پراجیکٹس۔ آغا خان تعلیمی بورڈ نامنظور۔ نظام تعلیم سروے۔ سفارشات۔ پاکستان میں خواتین یونیورسٹی کا قیام جمعیت کی انھی کوششوں کا ثمرہ ہے ماہنامہ پکار ملت پکار ملت اسلامی جمعیت طالبات کا نمائندہ جریدہ ہے جو طالبات کے متعلقہ اہم اور دل چسپ موضوعات پر تحاریر شائع کرتا ہے۔ آپ بھی اپنی تحریر پکار کو بھجوا سکتی ہیں اور اس کی سالانہ خریدار بن سکتی ہیں: ماہنامہ پکار ملت:۔ دفتر پکار ملت ، مرکز طالبات۔ منصورہ، ملتان روڈ، لاہور۔ ای میل : pukaremillat@gmail.com الجمیة پبلی کیشنز یہ ادارہ طالبات کی دلچسپی اور مزاح کو ملحوظ خاطر رکھتے ہوئے پر کشش انداز میںمطبوعات کی اشاعت کا کام کرتا ہے۔ اب تک منظر عام پر آنے والی کتب، میزان محبت ، راز حیات، نقوش سفر، آئینہ چمن در چمن مسلم ورلڈ آرڈر ہیں۔ اس کے علاوہ دیدہ زیب اسٹیکرز بیجز، وال چارٹس، لیٹر پیڈز ،ڈائریاں ، نوٹ بکس ، بھی آپ ایک فون کال پر منگوا سکتی ہیں۔ ای میل : aljamiapublications@gmail.com ممبران کے تربیتی نظام جمعیت نے اپنے ممبران کی فکری و عملی صلاحیتوں کو نشو و نما دینے کےلئے ایک جامع تربیتی نظام تشکیل دے رکھا ہے۔ جس کا مقصد ایک با عمل مسلمان کی تیار ی ہے۔ مطالعہ قرآن و حدیث و لٹریچر: ممبران کی تربیت کے لیے قرآن و حدیث اور لٹریچر پر مشتمل حصوں کو نصاب ترتیب دیا گیا ہے۔ممبران کو روزانہ کی بنیاد پر مطالعہ کرنے کو عادت ڈلوائی جاتی ہے۔ اپنے روزانہ کے مطالعہ کو آپس میں ڈسکس کرنا اور اسے اپنے لیے تربیتی اصول لینا بھی رائج ہے۔ تربیتی اجتماعات: ممبرا ن کے لیے ماہانہ تربیتی اجتماعات کا نظام رائج ہے۔ ان میں تعلیم قرآن و حدیث اور مختلف موضوعات پر ڈسکشنز کا اہتمام ہوتا ہے۔ ممبران ان فورمز کے ذریعے اپنی اصلاح بھی کرتے ہیں، دعوت الیٰ اللہ کے کاموں کا جائزہ بھی لیا جاتا ہے اور آئندہ کے تجاویز بھی پیش کی جاتی ہیں۔ تربیتی اجتماماعات: ممبران کے لیے ماہانہ تربیتی اجتماعات کا نظام رائج ہے۔ ان میں تعلیم قرآن و حدیث اور مختلف موضوعات پر ڈسکشنز کا اہتمام ہوتاہے۔ ممبران ان فورمز کے ذریعے اپنی اصلاح بھی کرتے ہیں، دعوت الیٰ اللہ کے کاموں کا جائزہ بھی لیا جاتا ہے اور آئندہ کے لیے تجاویز بھی زیر بحث آتی ہیں۔ خصوصی ٹریننگ ورکشاپس ۔ تربیت گاہیں کیمپس جمعیت کے تحت ممبران کے لیے طویل دورانیہ کے [سہ روزہ] تربیتی کیمپس کا انعقاد بھی کرایا جاتاہے۔ ان علمی مجالس میں ممبران کو خالص اسلامی ماحول میں اپنی تربیت و تزکیہ کا موقع ملتا ہے، صلاحیتوں کو پروان چڑھانے کے ادبی و صحافتی کورسز اور ورکشاپس منعقد جاتی ہیں۔ اس کے علاوہ مطالعہ کلاسز، فہم القرآن کورس، لیڈر شپ ٹریننگ کورسز ، مدرسات کی تیاری کےلئے خصوصی کیمپس بھی لگائے جاتے ہیں۔ نگران تربیت سسٹم نوجوان اسلام کی اصلاح اور پاکستانی معاشرہ میں اعلی ٰ سیرت و کردار کی حامل شخصیات کی تیاری کے لیے ہمارے ہاں نگرانی سسٹم رائج ہے۔ قرآن پاک میں ارشاد ہو تاہے۔” تم میں سے ہر شخص یہ دیکھے کہ اس نے کل کے لیے کیا سامان تیار رکھا ہے۔ [ سورة الحشر] اس سوچ کے تحت جمعیت کی ہر ممبر روزانہ کی بنیاد پر اپنا جائزہ فارم فل کرتی ہے۔ جس میں نمازوں ، اخلاقی و معاملات ، انفاق فی سبیل اللہ اور دعوت الیٰ اللہ کے کاموں کی بابت کالمز درج ہوتے ہیں۔ اس جائزہ فارم کی روشنی میں وہ اپنی ماہانہ رپورٹ بنا کر اپنی ساتھی سینئر ممبر کو دیتی ہے۔ چونکہ ایک طالبہ ہی دوسری طالبہ کی نفسیات کو بخوبی جان سکتی ہے لہٰذا خیر خواہی کے جذبہ کے باعث فرد سے فرد کی اصلاح کا یہ منفرد اور مضبوط طریقہ ہے۔ نگران اور زیر تربیت ممبران آپس میں قرآن و حدیث اور اسلامی کتب پر ڈسکشن کے ذریعے اپنی تربیت و تزکیہ کاکام کرتی ہیں۔